Говь-Алтай аймгийн Тонхил сумын уулын спортын ууган мастер Я.Жанцангийн нэрэмжит “Сутайн бор” клубын тамирчид Мөсөнд авиралтын 2017 оны Улсын аварга шалгаруулах VII тэмцээн амжилттай оролцож Тэргүүн байр эзэллээ.

Монголын Уулчдын Үндэсний Холбооны 2017 оны календарчилсан төлөвлөгөөнд тусгагдсан “отгон” тэмцээн буюу Мөсөнд авиралтын 2017 оны Улсын аварга шалгаруулах VII тэмцээн амжилттай зохиогдож дүнгээ гаргалаа. Эл удаагийн тэмцээн цаг агаарын харьцангуй хүнд / -36 С, салхитай/нөхцөлд боллоо. Говь-Алтай аймгийн Тонхил сумын Уулын спортын ууган мастер Я.Жанцангийн нэрэмжит “Сутайн бор” клубын тамирчид өргөн бүрэлдэхүүнтэй оролцож өндөр амжилт үзүүллээ.

Нийт: АЛТ 5, МӨНГӨ 4, ШАГНАЛТ IV байр 1, ШАГНАЛТ VI байр 1-ийг тус тус эзэлж багийн дүнгээр ТЭРГҮҮН байр /64 оноо/ эзлэв. Харин II ба III байруудыг UB hiking, Хязгааргүйд мац клубууд 29 ба 25 оноогоор тус тус эзэллээ.

”Сутайн бор” клубээс дор дурьдсан тамирчид медальт болон шагналт байрт шалгарав. Үүнд:

Өсвөр нас: Хурд

Нэгдүгээр байр, АЛТАН медаль Н.Сэлэнгэ Тонхил сумын дунд сургуулийн 7б ангийн сурагч, Спорт авиралтын II зэрэгтэй
Шагналт IV байр, Г.Лхагва-Очир Тонхил сумын дунд сургуулийн 8б ангийн сурагч, Спорт авиралтын II зэрэгтэй тамирчин

Залуучууд: Хурд

Нэгдүгээр байр, АЛТАН медаль Б.Ариунбаяр МУБИС-ийн Биеийн тамирын сургуулийн оюутан
Хоёрдугаар байр, МӨНГӨН медаль Ж.Сэдэд МУБИС-ийн Биеийн тамирын сургуулийн оюутан
Шагналт V байр, О.Тэргэл Тонхил сумын дунд сургуулийн 10а ангийн сурагч

Залуучууд: Техник

Нэгдүгээр байр, АЛТАН медаль Ж.Сэдэд МУБИС-ийн Биеийн тамирын сургуулийн оюутан
Хоёрдугаар байр, МӨНГӨН медаль Б.Ариунбаяр МУБИС-ийн Биеийн тамирын сургуулийн оюутан

Насанд хүрэгчид: Хурд

Нэгдүгээр байр, АЛТАН медаль Н.Хэрлэн ШУТИС-ийн оюутан, Спортын дэд мастер
Хоёрдугаар байр, МӨНГӨН медаль О.Сайханжаргал, Спортын мастер

Насанд хүрэгчид:Техник

Нэгдүгээр байр, АЛТАН медаль О.Сайханжаргал, Спортын мастер
Хоёрдугаар байр,МӨНГӨН медаль Н.Хэрлэн, ШУТИС-ийн оюутан, Спортын дэд мастер
Шагналт VI байр, Д.Хандсүрэн АШУҮИС-ийн оюутан, Уулын спортын III зэрэгтэй тамирчин нар тус тус эзлэв.
Мөн 36+ насны ангилалд багийн ерөнхий дасгалжуулагч, Спортын мастер Х.Нямдоо, Уулын спортын I зэрэгтэй тамирчин Х.Батсайхан нар амжилттай өрсөлдлөө.

Энэ удаагийн УАШТ-ний ШИЛДЭГ эрэгтэй тамирчнаар клубын залуу тамирчин Ж.Сэдэд шалгарав. Олон Улсын Хүүхдийн Найрамдал цогцолборын Захиргаанаас олгосон тусгай шагнал болох үнэ төлбөргүй амрах “Эрхийн бичиг” –ээр мөн клубын өсвөрийн тамирчин, Спорт авиралтын II зэрэгтэй тамирчин Н.Сэлэнгэ шагнагдлаа. УАШТ-ний “нээлт” залуу тамирчин Ж.Сэдэд байсан бол аргагүй чансаа зааж улсын аварга цол хүртсэн спортын мастер О.Сайханжаргалын амжилт клубын төдийгүй уулын спорт сонирхогч олны хайр хүндэтгэлийг хүлээж байлаа. Тус клуб энэ тэмцээнд анх удаа багаараа тэргүүн байр эзэлснээр түүхэндээ нэгэн шинэ хуудас нээлээ. Өмнө нь Мөсөнд авиралтын 2015 оны УАШТ-нд III байр эзэлж байсан юм..

Хоёр. ХОШОЙ, ХОС болон ШИНЭ АВАРГУУД ТӨРЛӨӨ

Спортын дэд мастер Н.Хэрлэн Мөсөнд авиралтын улсын аварга шалгаруулах 2016, 2017 оны тэмцээнүүдэд дараалан түрүүлж улсын хошой аварга, Спортын мастер О.Сайханжаргал, залуу тамирчин Ж.Сэдэд нар шинээр улсын аварга болсон бахдам амжилтын эзэд боллоо. Спорт авиралтын II зэрэгтэй тамирчин Н.Сэлэнгэ 2017 оны Спорт авиралтын болон Мөсөнд авиралтын Улсын аварга, Б.Ариунбаяр 2017 оны Хаданд авиралтын болон Мөсөнд авиралтын Улсын аварга тус тус болж хос амжилтаар баг хамт олноо хошуучилж байна. ”Сутайн бор” клубын Спорт авиралт болон Мөсөнд авиралтын бүх насны ангилалд оролцдог нийт тамирчдын маань амжилт “лидер” тамирчдынхаа араас шаргуу нэхэж буйг дурьдахад таатай байна. Мөсөнд авиралтын 2018-2019 оны улирлаас эхлэн манай эрэгтэй тамирчидтай зэрэгцэн эмэгтэй тамирчидаас Дэлхийн цом, Ази тивийн аварга шалгаруулах тэмцээнүүдэд хурд, хүчээ сорих цаг айсуй.

Гурав. Дэлхийн цомын цуврал, Ази тивийн аварга шалгаруулах тэмцээнүүдийг зорино

“Сутайн бор” клубын тамирчин Спортын дэд мастер Н.Хэрлэн, Спортын мастер О.Сайханжаргал нар үргэлжлүүлэн тун удахгүй Монголын Уулчдын Үндэсний Холбооны багийн бүрэлдэхүүнд орж БНХАУ-ын Хөх хот, БНСУ-ын Чонсон, ОХУ-ын Киров хотуудад зохиогдох Дэлхийн цомын аварга шалгаруулах цуврал болон Ази тивийн аварга шалгаруулах Мөсөнд авиралтын тэмцээнүүдэд оролцоно. Эдгээр тэмцээнүүдийг Олон Улсын Уулчдын Холбоо /UIAA/-ноос тухайн орны Уулчдын холбоодтой хамтран зохион байгуулдаг уламжлалтай билээ. Тамирчиддаа спортын өндөр амжилт хүсэн ерөөе!.

“Сутайн бор” клубын нийт тамирчид, дасгалжуулагч нарт Тонхилчууд, Алтайчуудынхаа нэрийн өмнөөс дахин баяр хүргэе!. 

 

НИЙТЭЛСЭН: 2018-01-31 02:11:38