АЛТАЙ НУТГИЙН ЗОН ОЛОН, АЖИЛСАГ БҮТЭЭЛЧ ТҮМЭНДЭЭ ХАВРЫН ТЭРГҮҮН САРЫН МЭНДИЙГ ӨРГӨН ДЭВШҮҮЛЖ, МЭНДЧИЛЬЕ

Дөрвөн улирал ээлжилдэг дэлгэр сайхан эх оронд минь хүйтний өвөл харьж, урин хавар айлчлан ирж байна. Өвөг дээдсээс минь өвлүүлэн ирсэн Монгол түмний үндэсний Сар шинийн баяр бол өвлийг өнтэй давж, элгэн саднаараа учран золгож, бэлгэтэй үг хэлэлцэж, бие биедээ сайхныг ерөөдөг гайхамшигт баяр, өв соёл билээ. 

Улиран одож буй гал бичин жил бидэнд сорилт бэрхшээл, ялалт амжилт, сургамж ухаарал олныг үлдээж хүн бүхэн нэгийг бодож хоёрыг тунгаан улс орныхоо ирээдүйд сэтгэл чилээсэн цаг үе байлаа. Бид бүхэн Алтайн зон олныхоо итгэл сэтгэл, намын журмын нөхдийнхөө хичээл зүтгэлээр улс, аймаг, орон нутгийн 3 шатны сонгуульд гялалзсан сайхан ялалтыг байгууллаа. Иймд цаашид та бүхэндээ амалсан мөрийн хөтөлбөрөө бүрэн хэрэгжүүлж, чиглэсэн зорилготой, чин эрмэлзэлтэй байж, цуцалтгүй, амалсан амлалтаа ажил хэрэг болгохоор хичээн зүтгэх болно. 
Өргөн уудам эх орныхоо өнцөг булан бүрт ажиллаж, амьдарч буй Монгол ахан дүүс нийт Алтайчууддаа XVII жарны “Алтан унжлагат” хэмээх гал (улаагчин) тахиа жилийн Сар шинийн мэндчилгээг хүргэж байна. Айл бүхэн инээд хөөртэй элбэг хангалуун, хүн бүхэн итгэлийн галтай, хийморийн цогтой, уужим сэтгэлтэй, ухааны цартай, тэгш дүүрэн жаргалтай байхын өлзийтэй ерөөлийг хүсье.

 

НИЙТЭЛСЭН: 2017-02-07 13:03:25