АЙМГИЙН ХҮҮХДИЙН ТӨЛӨӨ ЗӨВЛӨЛИЙН ТЭРГҮҮН, АЙМГИЙН ЗАСАГ ДАРГА С.ГАНСЭЛЭМ ЭРДМИЙН БАЯРЫН МЭНДЧИЛГЭЭ ДЭВШҮҮЛЛЭЭ.
Эх орон, Эх нутгийнхаа ирээдүй болсон хүүхэд багачууд, сурагчид, оюутан залуус, сурган хүмүүжүүлэх их үйлсэд хүчин зүтгэж байгаа багш, сурган хүмүүжүүлэгчид Та бүхэндээ “Эрдмийн баяр”-ын өдөр, 2017-2018 оны шинэ хичээлийн жилийн баярын мэндийг хүргэж, эрдэм номын гэгээн их үйлсэд тань амжилт хүсэн мэндчилье.
2016-2020 онд хэрэгжүүлэх аймгийн Засаг даргын үйл ажиллагааны хөтөлбөртөө сургуулийн өмнөх болон бага суурь боловсролын хамран сургалт, сургалтын чанарыг нэмэгдүүлж, хүүхдэд ээлтэй орчин бүрдүүлэн, боловсролын үйлчилгээг тэгш хүртээмжтэй хүргэхээр зорилтоо тодорхойлон ажиллаж байна. Энэ хүрээнд “Багшийн хөгжил”, “Оюунлаг Алтай”, “Сургалтын чанарыг ахиулах” хөтөлбөрүүдийг аймгийн иргэдийн Төлөөлөгчдийн Хурлын Тэргүүлэгчдээр хэлэлцүүлэн, батлуулж, та бүхэнтэйгээ хамтран хэрэгжүүлэхээр багш нар, хүүхэд багачууд, эцэг эхчүүддээ хүргэж байгаадаа баяртай байна.Сургуулийн өмнөх насанд хүүхдийн хөгжил хамгийн эрчимтэй явагддаг хүний хөгжлийн суурь үе байдаг учир сургалт, хөгжлийн орчинд түлхүү анхаарч, эрүүл чийрэг өсгөн бойжуулж, зөв төлөвшүүлэх, бага, дунд боловсролд сургалтын чанарыг ахиулах, сургалтыг зөв оновчтой арга зүйгээр зохион байгуулах, бүрэн дунд боловсролын тухайд шинэчлэлийн хөтөлбөрийг хэрэгжүүлж, зөв хандлага, ёс зүйтэй, эх оронч хүүхдүүдийг төлөвшүүлэхээр зорьж байна.
Улсын хөгжил хүнээс хамаарч, хүний хөгжил багшаас шалтгаална. Иймд боловсролын салбарт хэрэгжүүлэх “Багшийн хөгжлийн хөтөлбөр”-төө багш нарыг “судлаач-багш”, “сургагч-багш”, “багшийн-багш”, “манлайлагч-багш”, “эрдэмтэн- багш” нарыг төрүүлэхэд түлхүү анхаарч, багшийн хөгжлийг цогц байдлаар ханган тэдний шинэ санаа, бүтээлч хандлагыг урамшуулан хөгжүүлнэ.
“Сургалтын чанарыг ахиулах” хөтөлбөрөөрөө боловсролын үндсэн асуудал болох сургалтын чанарт онцгойлон анхаарч, сургуулийн заах аргын нэгдэл, хамт олны бие даасан байдлыг хангаж, сургалтын чанар үр дүнг үнэлж, ахиц өөрчлөлт бүрийг ойр ойрхон дүгнэж, хамт олон, багаар нь ажлын амжилтыг үнэлж, өмнөх хөтөлбөрийн залгамж холбоог ханган, сургалтын чанарт ахиц дэвшил гаргах зөв сургалтын арга зүйг дэмжиж ажиллахаар зорилоо. 
2016-2017 оны хичээлийн жилд элсэлтийн ерөнхий шалгалтын амжилтаараа манай аймаг улсад долдугаар байранд жагссан нь та бүхний сургалт хөгжлийн ажлын үр дүнгийн ахицыг харуулж байна. Бид жил бүр гаргасан амжилтаасаа ухрахгүй, урагшлан ажиллахаар хичээх хэрэгтэй байна.
Мөн бид ерөнхий боловсролын сургуулиудын бүтэц хэв шинжийг өөрчлөн ажилласнаар сургууль, хүүхдийн ялгааг арилган хүүхэд бүр боловсрол тэгш эзэмших орчинг бүрдүүлнэ. 
“Оюунлаг Алтай” хөтөлбөрийн хүрээнд аймгийнхаа нийт иргэдийн иргэний боловсролыг дэмжиж ажиллахаас гадна хүүхдийн оюуны чадамжийг ахиулах, үнэлэх олон хэлбэрийн арга хэмжээг хэрэгжүүлэн Алтайчуудын сэтгэлгээний цар хүрээ, хурдыг Монгол улс, тив дэлхийд өрсөлдүүлэхэд чиглүүлнэ.
Эдгээр хөтөлбөрүүдийг хэрэгжүүлж ажилласнаар аймгийн боловсролын салбарын хөгжил, өөрчлөлтийн ойрын ирээдүйн чиг хандлага, хүрэх түвшинд тодорхой ахиц дэвшил гарсан байхаар харж байна. Энэ нь багш сурган хүмүүжүүлэгч та бидний хамтын хичээл зүтгэлээс шалтгаална.
Энэ жил элсэлтийн ерөнхий шалгалтын дүнгээр улсдаа долдугаар байранд хүрсэн амжилтаа улам ахиулан сургалтын чанараараа улсад тэргүүлж байсан амжилтаа эргүүлэн авчирцгаая. 
Иймд чанартай боловсрол, чадварлаг иргэдийн мэдлэгт суурилсан бүтээгдэхүүнд тулгуурласан эдийн засгийг бэхжүүлсэн аймаг, байх нь бид бүхний хамтын ажиллагааны үр дүн. Боловсролын салбарын бүтээлч, оюунлаг, эвсэг хамт олон, Говь-Алтай аймгийнхаа хөгжлийн хурдасгуур, манлайлагчид байгаад тань талархаж, хүүхэд багачууд, оюутан залуус маань эрүүл саруул, хөгжил баясалтай, сурч мэдэх хүсэл эрмэлзлэлээр дүүрэн, багш нар маань сэтгэл өөдрөг, амжилт бүтээл арвинтай байхыг хүсэн ерөөе.
Эрдэм номын цагаан буян дэлгэрэх болтугай

ХҮНДЭТГЭСЭН: АЙМГИЙН ЗАСАГ ДАРГА С.ГАНСЭЛЭМ
 
 
НИЙТЭЛСЭН: 2017-09-01 11:01:01